#IwottBärneresi

Wosch d Zuekunft vo dire Gmeind de Aute überla?

Du hesch itz d Chance mitzrede, wo du in Zuekunft wirsch läbe und wohäre sich d Region Bärn entwicklet.

Wosch no lang uf di Online-Schalter warte?

Mir si üs einig, oder? E grossi Gmeind het meh Mittel u Möglechkeite, d Digitalisierig azpacke. Mir wei doch nümm uf d Gmeind für ne Uskunft oder ne Wohnsitzbeschtätigung für ds GA. Das muess eifach u schnäu übers Handy loufe.

#iwottBärnersii

Am 7. bzw. am 14. März stimme Chäsitz u Frouechappele über „die Aufnahme von Fusionsverhandlungen mit der Stadt Bern“ ab. Das tönt itz wider so technisch-politisch, aber ma cha’s o so säge: Es geit um d Zuekunft vo diri Gmeind u das betrifft o di!

Mir vom Verein „Bärn NEU gründe“ setze üs sit meh aus zäh Jahr derfür i, dass d Gmeinde ir Region Bärn sich zämeschliesse. Das het gueti Gründ:

Du läbsch doch im Dorf u i dr Stadt, d BT isch doch o di Dorfplatz

Scho lang si d Stadt und d Gmeinde drum ume e einzigi Region, wo mir schaffe, wohne, Fründe träffe, ichoufe, trainiere, a Konzärt u i Usgang gö, Mätsche vo YB u vom SCB bsueche. Mir fahre vo eire Gmeind i di anderi, mängisch ohni dass mir das merke. D Gränze si zuefällig, historisch u nume no politisch. Aber sie hemme d Entwicklig vor ganze Region.

Wie wär’s, ire grüene Stadt z läbe?

Ou was dr Klimaschutz betrifft het es Bärn meh Möglechkeite u Kompetenze. Statt das jedi chlini Gmeind für sich chli öppis macht, cha me aus grossi Stadt dere grosse Useforderig umfassend u koordiniert begegne.

Merci u bis gli im nöie Bärn!

U säg’s doch no dine Kolleginne u Kollege.

Übrigens, i dr Abschtimming in Chäsitz u Frouechappele geit's afe drum, im Schpiu z'blibe:

Bim e ne Ja wärde Fusionsverhandlige ufgno u im Jahr 2023 wird ändgüutig abgschtumme. Bim e ne Nei si mir duss - Schpiu verbi!

Du wosch doch wähle, wär z Bärn Stapi wird, u mitbeschtimme, was z Bärn louft?

So wie s hüt isch, läbsch du zwar im Dorf u verbringsch dini Zit ir Stadt. Das isch di Lebensrum. Aber mitrede, was in Bärn (u de andere Agglogmeinde) passiert, das darfsch nid. Da isch me z Ostermundige witer. Da finde itz de Fusionverhandlige mit Bärn statt.

Gib dire Generation ä Stimm!

Übrigens: Abstimme isch no nie so eifach gsi: Stimmzettu usfüue, unterschribe, Cuvert zue u ab i Briefchaschte!