Am 7. bzw. am 14. März stimme Chäsitz u Frouechappele über „die Aufnahme von Fusionsverhandlungen mit der Stadt Bern“ ab. Das tönt itz wider so technisch-politisch, aber ma cha’s o so säge: Es geit um d Zuekunft vo diri Gmeind u das betrifft o di!
Mir vom Verein „Bärn NEU gründe“ setze üs sit meh aus zäh Jahr derfür i, dass d Gmeinde ir Region Bärn sich zämeschliesse. Das het gueti Gründ:
Scho lang si d Stadt und d Gmeinde drum ume e einzigi Region, wo mir schaffe, wohne, Fründe träffe, ichoufe, trainiere, a Konzärt u i Usgang gö, Mätsche vo YB u vom SCB bsueche. Mir fahre vo eire Gmeind i di anderi, mängisch ohni dass mir das merke. D Gränze si zuefällig, historisch u nume no politisch. Aber sie hemme d Entwicklig vor ganze Region.